ఓ మహాత్మా , ఓ మహర్షీ !
ఏది చీకటి , ఏది వెలుతురు ?
ఏది జీవిత, మేది మృత్యువు ?
ఏది పుణ్యం , ఏది పాపం ?
ఏది నరకం , ఏది నాకం ?
ఓ మహాత్మా !
ఏది సత్యం , ఏ దసత్యం ?
ఏ దనిత్యం , ఏది నిత్యం ?
ఏది ఏకం, ఏ దనేకం ?
ఏది కారణం , మేది కార్యం ?
ఓ మహాత్మా !
ఏది తెలుపు , ఏది నలుపు ?
ఏది గానం, ఏది మౌనం ?
ఏది నాది , ఏది నీది ?
ఏది నీతి , ఏది నేతి ?
ఓ మహాత్మా !
ఏ దహింస , ఏది హింస ?
ఏది కష్టం , ఏది సౌఖ్యం ?
ఏది నష్టం , ఏది లాభం ?
ఏది మంచి , ఏది చెడుగు ?
ఓ మహాత్మా !
ఏది స్వప్నం , నేటి సత్యం –
నేటి ఖేదం , రేపు రాగం –
ఒకే కాంతి , ఒకే శాంతి –
ఓ మహర్షీ , హే మహాత్మా !
ఖడ్గసృష్టి – మహాకవి శ్రీశ్రీ
జాబిల్లి 